نادم.....للنقاش

مرحبا يااصدقاء
اغنية نادم التي كتبها ولحنها حبيب القلب مروان وغناها النجم صابر الرباعي
رح تكون موضوع نقاشنا اليوم
نادم كتبها مروان باحساس العاشق اللي غلط بحق حبيبتو
ومش عارف شو بيقدر يساوي ليرضيها
ويمكن اول خطوة بدرب المصالحة هي ابداء الندم
نادم والله نادم نادم ع اللي صا ر والله العالم باللي صاير
نادم والله نادم ع اللي ضيعتون من ايدي وكنت الخاسر
وحدي يا قلبي انا رح كمل المشوار
مروان هون رسم صورة تشاؤوم العاشق لما بيغلط بحق حبيبتو وبتصد عنو
كيق حس باحساس انو ضيعها من ايدو وكان الخاسر
وهالشعور القاتل هاد بيكوي العاشق بنار الالم والقهر
وبيرجع مروان بيقول راح الصبر روح اعتذر
بعد ما قال انو همو ما عاد ينحمل
هون مروان انتقل لشوية تفاؤول بالاعتذار والاسف لعل الاعتذار بيصلح اللي انكسر
ولسى في عندي كلام كتير عن هالاغنية
بس بدي اسمع منكم رأيكم بكلماتها بالاول لحتى اقدر اطرح فكرتي كمان بوضوح اكبر
وهون عندي فكرة ما بعرف شو رأيكم فيها
ما اقسى الندم عندما يكون زعل الحبيب وصده ناتجا عن تصرف غير مقصود من قبل الحبيب
هذا التصرف الغير مقصود يلهب افكار الحبيب بنار الشكوك والظنون ويستتبع ذلك سوء تفهم وتقدير لتصرفات الحبيب
وعندها يكون الندم اصعب من قبل العاشق
لانه لم يغلط ولم يقصد ان يغلط
ولكن للاسف هذا هو القدر
وعندها رب العباد وحده يقدر على تغيير شكوك وظنون ذلك المحب عن حبيبه
وهو يكون الامل الوحيد للعاشق النادم
وما اضيق العيش...
لولا فسحة...
امل....
بانتظار ارائكم
احمد

مرسي الك حمادة ع الموضوع الجميل وكلمات الاغنية الرائعة واكيد الندم مابينفع لو كان غلط الحبيب بحق حبيبتوا كبير وتسبب في جرح للحبيبة ساعتها ماراح تسامحو وحتى لو سامحتو فراح تقل ثقتها فيه ومافي احلى من الاخلاص في الحب وارضاء الحبيبة باي شكل من الاشكال لو كانت هالانسانة مخلصةوماأساءت لحبيبها مع شكري وتقديري[i][b]

بتندم عالحب اللي كان عالقلب ل كلو حنان..... انت تركت الجنة يا فلبي واحترقت بنار..... يتندم عالقلب الهني عالحب اللي قد الدني..... انت اخترت وانت يا قلبي ما عرفت تختار..... نادم والله نادم عاللي صاير والله عالم بللي صاير..... نادم والله نادم عللي ضيعتن..... من ايدي وكنت الخاسر وحدي يا قلبي أنا رح كمل المشوار..... نادم عا غيابو الليالي محروم النوم زعلان عليهم من حالي وعلي اللوم..... حسيت بنار لما حرقت قلبي النار..... نادم..... نادم.. يا ندم يا ألم زاد بقلبي الضنا..... ما عاد ينحمل راح الصبر روح اعتذر بركي يا قلبي..... بقلبن أنا باقيلي أمل..... هني الضحكة لعيوني والكلمات الحنوني..... نادم..... نادم.


حبيت احط الكلمات


راجعة للمناقشة بعدين

اول يلاحظ في كلمات الاغنية تكرار حرف "ن"
الي هو اول حرف من كلمة "نادم" و "نار"
و هالكلمتين هم المسيطرين على كل الاغنية
الحبيب هون ما بيحط اللوم على نفسو
اللوم كلو على "القلب"
العقل هون في حوار مع القلب
و حسب رايي هاذي القصة
العقل اختار الحبيبة (رغم في العادة ديما نلاقي انو القلب هو الي يختار)
القلب ضيع هالحبيبة و احترق
العقل يرجع حتى يلوم القلب
وكانو يستهزأ بيه كيف يندم"بتندم عالحب اللي كان عالقلب ل كلو حنان..... انت تركت الجنة يا فلبي واحترقت بنار.يتندم عالقلب الهني عالحب اللي قد الدني..... انت اخترت وانت يا قلبي ما عرفت تختار"
العقل يوم نفسو كمان "نادم والله نادم عاللي صاير والله عالم بللي صاير..... نادم والله نادم عللي ضيعتن..... من ايدي وكنت الخاسر وحدي يا قلبي أنا رح كمل المشوار"
الحبيب ندمو الوحيد انو ترك قلبو يتحكم بيه و بمشاعرو
القلب اكيد حب وحدة ثانية بس صار هالصراع بينو هو و العقل و العقل فاز في الاخير لانو الحبيب حب يرجع لحبيبتو الي اختارها
بس للاسف لقى القلب خسرها
فالندم هون على ترك مشاعرو بايد القلب و الندم اكثر على انو حب هالانسانة لانو ما يستحقها
هالحبيب الي كاي حبيب مش معترف بغلطتو مباشرة
غلطة القلب هي
و نلاحظ هذا من خلال صيغة الكلمات لانو طول الاغنية اذا في لوم كلو يكون على القلب
بس للمصالحة هو الي رح يطلب عفو الحبيبة
الحبيب كانو يتبرا من قلبو "وحدي يا قلبي أنا رح كمل المشوار"
من زعلو على القلب يرجع الحبيب يحكي مع الند
"يا ندم يا ألم زاد بقلبي الضنا..... ما عاد ينحمل راح الصبر"
و كانو يلاقي الراحة في الندم و بمساعدة الندم و الالم يطلب من قلبو انو يتحمل مسؤوليتو و يروح يعتذر"روح اعتذر بركي يا قلبي."
و بعدها نشوف الحبيب اول مرة يتغزل بالحبيبة"هني الضحكة لعيوني والكلمات الحنوني"
و بعدها يرجع يتذكر ندمو بس ما في حل غير الاعتذار


مروان عندو تدرج غريب في وصف الوضعية و سرد القصة
من اللوم الى الالم الى الندم الى الغزل
يعطي من خلال هالتدرج امل لكل عاشق في مصالحة حبيبتو
يعطي حكمة انو ما نتركالقلب يتحكم بينا
العقل هو الاساس لكل علاقة
وورانا كيف القلب فشل في اختياراتو بس كل الالم يعود على الحبيب
من زعل و ارق و ندم

بدون تطرق للحن الرائع ل"نادم"

مروان ابدع كلمات و لحنا
و صابر ابدع اداء و احساس

انشالله ما طولت عليكم
بس اغنية تستحق
و لو ماكنت خجلانة منكم كنت ظليت يوم كامل احلل و اناقش هالرائعة

يعطيك ألف عافية يا حمادة على الطرح المميز
مروان فعلا يعرف كيف يعبر عن مشاعر الشخص لما يخون حبيبته بأسلوبه الشاعري البسيط وأنا ما كنت أدري إنه كتب عن خيانة الرجل للمرأة بس رح أدور على الأغنية وأسمعها وأكيد إنها روعة لأنها من إبداعات حبيبنا مروان

هاذي الاغنية لكل الي ما يعرفوها
[ندعوك للتسجيل في المنتدى أو التعريف بنفسك لمعاينة هذا الرابط]

هاي
كتير حلو هالموضوع تسلم يديك

نظرا لظروفي وانشغالاتي ماراح اقدر قول كل اللي عندي
بس لأني حبيت الموضوع كتير
لازم راح علق عليه
ع السريع

أولا : اغنية نادم من الاغاني اللي كتير انا بحبها بيكفي انها من كلمات والحان الغالي مروان ولأن الفنان صابر قدر يوصل الاحساس ( طبعا لو غناها مروان بتكون اجمل بلا منازع ) وتمنيت انو يكون فيه تعاون
بين مروان وصابر بس للأسف ما صار

التعليق على الاغنية ..
فعلا مثل ما قلت انت في البداية انه حبيب بيعتذر لحبيبته بغلط أو زلة صدرت منه ( ممكن يكون هالحبيب فعلا حبيب وغلط غلطة ما بيقصدها وخارجة عن ارادته - وممكن يكون واحد بيلعب وماخذ الاعتذار بس لكي يلعب بمشاعر من أحب )
طبعا الاحتمال التاني انا مابحبو ابدا وماحدا بيحب المكر واللعب بمشاعر الآخرين
فلذلك انا اكيد راح اعلق على الاحتمال الاول ( يكون هالحبيب فعلا حبيب وغلط غلطة ما بيقصدها وخارجة عن ارادته)
ولهذا القصد بالتأكيد الغالي مروان خوري كتب هذه الاغنية الراااااااءعة
في مطلع الاغنية
+
----
-بتندم عالحب اللي كان عالقلب ل كلو حنان..... انت تركت الجنة يا فلبي واحترقت بنار..... يتندم عالقلب الهني عالحب اللي قد الدني..... انت اخترت وانت يا قلبي ما عرفت تختار.....
هنا الحبيب يخاطب ويحادث نفسه
بتندم ع الحب اللي كان ع القلب ال كلو حنان
يعني بسبب هالغلطة اكيد الحبيبة انجرحت وحابة تبتعد اذا ما لقت مبرر وسبب مقنع للغلط ( وهذا من حقها طبعا وشي طبيعي ) فبذلك لأن الحبيب عارف هالنهاية
بيقول لحاله اذا ما صلحت غلطي اكيد بندم على هالحب اللي كان وراح ينتهي اكيد بندم على هالقلب قلب حبيبته المليان حنان اذ ا تم الابتعاد وكل واحد راح في طريقه وما اتصلحت الامور
ومن ثم
يقول صورة تشبيهية غاية في الجمال والروعة( انا شخصيا بموووت فيها)
وهي ( انت اتركت الجنة ياقلبي واحترقت بنار )
وهنا مازال الحبيب يلوم نفسه
ويقول بأنه ترك الجنة وفرط بها لما ارتكب هالغلط فكانت نهايته أنه احترق بالنار > الله يبعدها عنا وعنكم ياااارب < فشبه محبوبته بالجنة وفراقها نار

وبعد النقاش بينه وبين نفسه
اعلن ندمه ومن ثم اعتذاره

نادم والله ناادم نااادم عاللي صار والله العالم باللي صاير
هنا يحلف ويعترف الحبيب بغلطته ويحلف بصدق ندمه
وهذه بداية محاولة لتفهم الحبيبة حبيبها وتتفهم الغلط لترجع المياه الى مجاريها

ثم يقول ويتوجع
آه وحدي يا قلبي انا راح كمل المشوار

( نادم ع اغباب الليالي محروم النوم
زعلان اعليهن من حالي وعليي اللوم )
يعني بأنه نادم ع الليالي الي مضت وهم متخاصمين فيها
فبذلك هو اكيد بيكون لوحده والتفكير فيها سرق النوم من عيونه
وبالرغم من انه زعلان عليها من نفسه وبيلوم نفسه ايضا هناك من يلومونه ( على ما اعتقد )
وهذا يسبب تعب كبير للنفس كيف بيتحمل هاللوم ذا كله؟؟؟!

طبعا هنا مثل مايقولوا في الامثال الشعبية ( ما يحس بالنار إلا اللي وطاها )
كتب مروان بيت فيه حكمة راءعة وهي واقعية مية بالمية وبتشبه هالمثل في فكرتها
( حسيت بنارن لما حرقت قلبي النار )
صورة راءعة وواضحة ما تحتاج الى شرح

في النهاية
يقول الحبيب
ياندم يا الم ( وكأنه ينادي الندم والألم اللي صابه وكأنه هالندم والالم صاحب له يحادثه ويفتح له قلبه )
زاد بقلبي بقلبي الضنا
ماعاد ينحمل ( من كثر هاللوم وغيره لدرجة انه انهك واتعب نفسه لدرجة لا تحتمل )
فهنا يحاول ايجاد الحلول ليريح نفسه
ويقول
راح الصبر ( شي طبيعي كل شي له حد وهو صبر بما فيه الكفاية وللصبر حدود )
روح اعتذر ( يحاول فتح باب للأمل واصلاح الأمور وإعادة المياه الى مجاريها )
بلكي يا قلبي بقلبن انا باقيلي امل (يقول انه بيروح يعتذر وهذه خطوة حلوة ما راح يخسر شي يمكن مازال لي مكانه في قلبهن فبالتالي بيسامحوني وبرجع للحب اللي كان والقلب المليان حنان وبخرج من النار وبرجع لجنتي لكي لا يتألم طوال حياته ويتحسر)
فيختم كلامه
عن سبب ألمه ومحاولته الشديدة للأعتذار والعودة
هي ان محبوبته ( هن الضحكة لعيوني والكلمات الحنونى )هي الضحكة لعيونه والكلمات الحنونة
فبفراقهم لاضحكة مرسومة على ثغري
ولا توجد احن من الكلمات اللي بتخرج من قلبا

**********************************
وانا بقول بالنهاية بدون مروان و بدونكم يا احلى فانز وعشاق عشاق الفنان الشامل مروان خوري ماراح تنرسم ولا ضحكة ع شفايفي
وبتمنى اني اقدر اتواجد بالمنتدى بيناتكم 24 ع 24
بس الظروف ما تسمحلي
ف اعذروني
*********************************** انتهى
والله وصار تعليقي أطول تعليق ههههههه وبقول ع السريع راح علق
ان شاء الله ينال اعجابكن
بس مازال عندي كلااااااام هههههههه
بس الموضوع بيفتح النفس اختيار راااااااااااءع
شكرا مجددا عالموضوع الجميل

مشكور حمادى
على الاختيار الممتاز
لهذه الاغنيه " نادم " كلمات والحان
المبدع الشامل مروان و اداء امير الطرب
صابر الرباعي ...

في الحقيقه ما شاء الله الاعضاء ما قصرو في تحاليلهم
لهذه الرائعه ... و لم اجد اضافه ...

حلو ان مروان يطرق مواضيع عده في اغانيه :
الندم..الخيانه..الحب من اول نضره.. الامل..
وغيرها من المواضيع...

والاحلى هي احاسيس مروان المرهفه والقويه
ونظرته للأشياء و التعبير عنها ، هي التي تختلف
عن غيره وتخلينا وكاننا نكتش الموضوع لأول مره

شكرا حماده على الفكره والموضوع
:))°°((:

تسلم حمادة اختيارك لاغنية نادم مميز
لأنها من اجمل الاغاني كلمات والحان واداء
كلماتها بتوصل القلب بسهوله
كمان احساس صابر وادائو كان رائع اعطاها طعم مميز
نادم ع غيابن ليالي محروم النوم زعلان عليهن من حالي وعليي اللوم
حسيت بنارن لما حرقت قلبي النار
موضوع عن ندم الحبيب الي عشق بس غلط بحق حبيبتو
شكو فيها خلاه يخسرهاقصتو انتهت معها بس ما انتهت مع قلبو الي صار متل النار بفقدانو الها وندمو
انا من جهتي بحبها كتير كلماتها بتوصل للقلب
مش بس للندم هي كمان لفقدان حبيب
مهما حللنا كلماتها او وصفناها بكون الاحساس ما بينوصف وقت نسمعها

قبل كل شي انا بدي اتشكر الكل ع المشاركة والتحليل المميز للاغنية وكلماتها وموضوعها
وانا هالبداية الحلوة لمواضيع نقاش الاغاني خلتني اتفائل بانو رح نقدر نقدم شي جديد للمنتدى بجهودكم وجهودي بطرح الاغاني للنقاش
رح اطرح فكرتي عن هالغنية بعد ما تمعنت بقراءة كل ردودكم التحليلية
عنجد اقسى حالات الانسان عندما يعيش ايام حلوة وفجأة ينتهي كل شيء او يحصل صد من قبل الحبيب
وهنا مروان اشار لهالنقطة لما قال بتندم ع الحب اللي كان ع القلب الكلو حنان
وفعلا اصدق تشبيه لهالحالة هو اللي طلع من الجنة للنار وهاد اقسى من انو الانسان يدخل فورا ع النار بدون ما يذوق حلاوة الجنة
لما بيذوق حلاوة الجنة بيصعب عليه يقدر يستغنى عنها فكبف اذا كان البديل هو النار
فعلا اللي بيحب بصدق بيندم ع الحب الهني ع الحب اللي قد الدني ووقتها فورا بيجي الندم ع سوء التصرف والتقدير والاختيار في تعاملنا مع المحب
وهون مروان بيقول انت اخترت وانت يا قلبي ما عرفت تختار
فعلا الله وحده بيعلم بحالة الحبيب بهالحالة وهو اللي ضيع بغلط غير مقصود ع الاغلب لانو هون بيكون الندم اقسى الحبيب من ايدو وكان الخاسر
وما اقسى شعور الوحدة بهالحالة
:وحدي يا قلبي انا رح كمل المشوار:
هلأ بيجي المحب ليحسب نتيجة غلطو وكيف اللي بيحبها بسبب هالغلط تركتو وكيف عم يعيش الايام والليالي بقسوة وبلا نوم وكيف الزعل رح ياكل من جسمه ومن نفسه وفوق هاد كلو الاحساس بعقدة الذنب اللي بيقتل قتل
وفعلا بهالحالة الانسان بيحس بطعم المر والالم والنار بشكل حقيقي ودائما الانسان بيتعلم من تجاربو ومن كيسو متل ما بيقولو ووقتها بس بيحس بمعنى النار والعذاب
نادم عا غيابو الليالي محروم النوم زعلان عليهم من حالي وعلي اللوم..... حسيت بنار لما حرقت قلبي النار
عنجد شعور فوق الوصف وما بينحمل ولا باي شكل
شعور بيحسس الانسان انو حياتو ع مفترق طريقاما الى الهنا والسعادة بالاعتذار وطلب المسامحة من الحبيب
اول الى الكارثة بغياب الحبيب واصرارو ع الصد والفراق
وهون بيصير فيه متل الغريق اللي بيتعلق بقشة
وبيتامل بركي بقلبن لسا في امل
وما بيعطي هالشعور بالامل الا تذكر الايام لحلوة والكلمات الصادقة اللي بيحكيهاحبيبو عنو
ووقتها بيكون ادام فكرة انو اللي بيحب بصدق بيسامح وبيغفر
وهالشي بيعطيه شوية امل وخاصة اذا كان غلطان مش بقصد ووقتها بيحس انو في رب رح يهديها للصواب لانور ربنا ما بيرضى بالظلم
بس جد ما اقسى الشعور بالندم وما اقساه اكثر ان كان الغلط غير مقصود
مروان كان كتير موفق بطرح هالموضوع كالعادة ومش غريب عليه هالشي
وطرحو كانو مروان عاش هالتجربة لانو وصف كل حالات العاشق بصدق بهالحالة
وبالتدرج المنطقي لهالحالات اللي بيمر فيها العاشق النادم
شكر كبير للكل ع المشاركة وبانتظار باقي الاراء
وعنجد كتير فرحت انو هالفكرة لاقت صدى طيب عندكم
وخصوصي انها خط جديد بالمنتدى عن حبيب القلب مروان بعد ما تناولنا صورو واخبارو واشعار عنو
حلو انو يكون في شي جديد هو انو تكون اغانيه الكثيرة موضع نقاش من قبلنا كفانز مروان
تحية الكم
احمد